Pooh家又有新成員

BFC~~都叫咗你咪成日湊晒D Pooh番屋企架啦，地方淺窄，盞你自己無得瞓，比佢地踼落床架咋~~~(嘻嘻嘻)

上星期四，去咗世貿掟公仔，本來昅中一隻pooh，點知要掟中一個比一蚊銀大小小的"紫"色先得到喎.....唉，我地技術所限，掟咗成60蚊，先換嚟以下的一堆"戰利品"，記住，係無Pooh份的.....

跟手再去夾公仔，唉.....又係望門興歎果種!

我DAI B帶住失望的心情、側住頭咁離開。哈，點知去到一個商場的玩具鋪，比我見到頭先夾公仔的其中一隻喎....WOO......就係咁，"基基"就跟咗我地返屋企嘞(早知慳番掟公仔D錢直接去買好過啦)!!

再星期五，去咗sogo頂樓的童裝展幫兩位小美人睇鞋，最後各買一對....心心姐女仔斯文鞋，諾諾哥涼鞋....心媽，買鞋係要啱啱好架，太大size好易甩鞋架!! 你明白嗎?? HAHA

去完sogo頂樓，怪事又發生啦...原本我地搭的lift，以為直落地下，咁我地又想行吓至愛的精品部，咪諗住落地下再轉lift上番去囉....哈，點知到6樓時(即精品部)lift門突然打開，原來有人入lift，我地咪第一時間衝出去囉....呢個根本就係天意!!

嚟得精品部，少不免去GIFTLAND一巡，OH，咁快賣X'MAS POOH?? 店員話POOH實在太好賣，無新貨，唯有X'MAS的都拿來頂住檔先!! 唔好啦~~你地唔好再叫啦~~尤其係你，好啦好啦，帶你走啦，"巨無嫂"!!