諾諾金句 (十六)

一日返學途中，諾諾突然同心媽講：

諾諾：媽媽，我己經到你呢度(手臂)啦!
心媽：係呀，你食多D飯好快高過我啦!
諾諾：好野......高過你可以參加香港小姐......

諾諾金句 (十五)

上星期幼稚園生日會前一晚11點，諾諾未瞓得著，突然眼懞懞地走入心媽房：

諾諾：媽媽呀.....我聽日應承咗老師要整魚旦返去開生日會喎。
心媽：吓? 你上次去旅行食剩得3粒咋喎，咁小.....不如帶提子返去啦!
諾諾：咁好啦......咁我唯有同老師講媽媽食晒D魚旦啦!

諾諾金句 (十四)

某日某時某地............

諾諾：SO FAR SO GOOD.....炸隻龍蝦......

?!?!?!?!?!?!?!?!?!

原來小朋友唔知咩叫"咋咋臨啦".....HOHOHOOOOO

諾諾金句 (十三)

(諾諾的志願)

有一日，諾諾突然同我講：

諾諾：我大個想做老師。
(真係好嘞，志願想"作育英才")
DAI B：係呀? 咁做咩老師呀?
諾諾：唔....幼稚園老師啦....教K1
DAI B：點解呀?
諾諾：因為教K1可以唔洗識咁多野囉.............

真的有大志!!!!!!!HAHAHAHA

諾諾金句 (十二)

話說搭港鐡等車，心爸同諾諾响地圖前玩認站名。諾諾企前面，心爸企後面。每講啱一個站，諾諾便會開心得崩崩跳。就咁樣，連踩心爸數腳咁多。

心爸：喂，諾諾，你踩咗我好多吓啦喎!
(諾諾眼碌碌望向心爸)
(正當大家以為諾諾定會SAY SORRY之際)
諾諾：我諗你要"吞"後小小企嘞!

旁人立即大笑，心爸哭笑不得。

諾諾金句 (十一)

噚日，諾仔放咗學，打電話同媽媽傾"心事"：

諾仔：點解爸爸同姨丈返工都唔打電話比我架?究竟佢地有無返到公司架?
(原來無打電話向佢報到，代表無返公兼"吞POP")
心媽(忍住笑）：唔知喎，或者你下次叫佢地打比你囉。
諾仔：好呀！返工都唔打比我，要打先得架嘛................

我DAI B由於好耐之前已打過一次，所以佢無再追究我!

諾諾金句 (十)

响老蘭，dinner食泰/越菜，叫咗個菠蘿炒飯。响炒飯面，放有肉鬆同腰果。腰果啊腰果，係我至愛之一。

"不"炒飯時，我見到腰果响對面，即心媽果邊(我地坐的排位依次係Dai B、諾仔、心媽)，咪打算伸隻匙去"不"囉。點不知....激氣....心媽呀....佢呀....幾過份呀.....居然一秒內將剩低的三粒腰果一二三咁夾晒落諾仔隻碗度喎! 咁我呢?

於時乎，我扁晒咀，同對面的BFC投訴。咁點啫，咪繼續食飯囉! 耶!

突然間，有隻匙上面有粒腰果伸咗過嚟，原來係諾仔，佢用好憐惜的眼光望住我：

諾仔：姨姨，比你食呀!
Dai B：好呀! 多謝晒!
(正當我想放入口之際)
Dai B：你有無LAM過架?
諾仔：無LAM過架喎...

食飽飽，我地手拖手行街街：

諾仔：姨姨呀，第時媽媽夾腰果落我隻碗度，我都比晒你食呀!好唔好?
Dai B：係呀? 好呀....多謝晒喎....(SWEET爆)

第二朝心媽拖住佢返學時：

心媽：你係咪第日都請晒d腰果姨姨食呀?
諾仔(理直氣壯)：無呀!
心媽：吓? 唔係喎，你噚日明明話第時請晒姨姨食架喎...
諾仔(狠狠地)：唔得.....(個"得"字拉得好長)
心媽：吓? 你唔記得咗啦?
諾仔：媽媽呀....你睇果邊...........(直頭叉開話題)

有無搞錯，mug你咁無口齒架? 等我空歡喜一場! 做人都無承"諾"既!哼 x N!

諾諾金句 (九)

噚日朝，一起身，諾仔坐响梳化，心媽路經~~

諾諾：媽媽早晨，我好想攬吓你呀!
(唔通有事相求?)
心媽：好呀!
(一臉歡欣，走埋去比佢攬)
諾諾(大大聲)：媽媽，我真係好鐘意你呀!我真係覺得你好肥呀，仲好好攬添喎......
(心媽當堂成個醒晒，但怒氣只能往肚中湧)
(其他人大笑)

諾仔真係坦白得可愛架啫! hahahahaaa

諾諾金句 (八)

星期六晚，响Pooh House，諾仔睇煮餸節目，我响廚房飲水，諾仔突然大叫：

諾仔：嘩，姨姨，好靚呀!
我：姨姨梗係靚啦，傻既。
諾仔：我唔係話你呀，我係講緊碟餸呀!

搞錯? 咁都比你過咗一棟!

BFC，洗唔洗笑得咁大聲呀你?

諾諾金句 (七)

星期日，NOK仔同心媽掟波波，玩玩吓.....

(心媽突然被電視吸引，所以接唔住個波)
心媽：唉吔.....跌咗添.....
諾仔(敦起個嚴肅樣)：你掛住睇電視，梗係接唔到啦!
心媽：係呀，好睇嘛。
諾仔：我唔同你玩啦....

(過咗一陣，諾仔突然又拋個波比心媽)
心媽：你又話唔同我玩既?
諾仔：我見你悶，咪同你玩一陣囉!

真係體貼架啫! HAHAHAHAAAA

諾諾金句 (六)

上星期某一日......

兩位美人如常放學後打比媽媽報平安，到諾諾傾時，又係先嚟一大堆無聊說話，突然間：

心媽：好啦，收線啦，你換完衫再打比我啦!
(通常"金魚"諾仔都會唔記得)
諾諾：咁我收線啦喎! 你唔好再"喂"我啦喎!byebye
du...........................(洗唔洗收得咁快呀?!?!?!)
(當時心媽在公司，旁邊有同事，明明聽到佢講緊電話，突然收線好怪啫，唯有硬住頭皮自言自語)
心媽：好啦...bye...bye(其實對住一個發出刺耳"du"聲的電話筒)

====================================================

又係上星期某一日......返學時突然落雨.....

諾諾：媽媽，落雨喎，你有無帶遮呀?
心媽：有呀...但爸爸無帶喎!
諾諾：你去遮埋佢咪得囉!
(爸爸返工咁遠，去得遮都濕晒啦)
諾諾：咁姨姨又有無帶遮呢?
心媽：我諗都無嘞!
諾諾：咁你去遮埋姨姨啦!
心媽：我又遮爸爸，又要遮姨姨，把遮邊有咁大喎?
諾諾：你帶把大d既遮咪得囉!
(諾仔心諗：醒小小啦...媽媽)

查實係諾仔之前見過一把勁大的太陽傘，佢成日扮擔遮遮晒我地，佢咪以為落雨用幾大把遮都得囉!!!

諾諾金句 (五)

2007年8月19日

人物：心爸、心媽、諾仔(心心同婆婆去咗屯門)
地點：往深水埗

諾諾：媽媽，我地去邊呀?
心媽：深水埗囉。
諾諾：深水埗遠唔遠架?
心媽：幾遠架...
諾諾：咁洗唔唔洗搭車車架?
(心媽諗，梗要啦，唔通行路咩)
心媽：要架....
諾諾：吓?咁我咪又要嘔囉?
(諾諾好易暈車浪，長頭車係死敵....原來佢以為要搭巴士)
心媽(彷然大悟)：啊....搭地鐡得架啦.....
諾諾：好嘢!
(隨即蹦蹦跳興奮莫名)

去到深水埗，"區"緊雨，非常悶熱。
諾諾：好熱呀!我地幾時行商場呀?
心媽： 就啦.....一陣啦....
(終於入咗一間商店仔，享受一下陣陣的涼意)
諾諾(自言自語)：嘩! 好涼呀!!
(唔夠兩分鐘，又要走)
諾諾：吓?咁快?
(行唔夠十步)
諾諾：媽媽，究竟我地幾時去行商場啫?

諾諾金句 (四)

2007年8月11日

去婆婆度食完飯，走嘞，of coz又叫爸爸抱佢上個cctv度同公公婆婆拜拜架啦!

其間發生以下事件~~
心媽：諾諾呀，媽媽定姨姨高d呀?
諾諾：媽媽(心媽暗喜，以為話佢).....矮D.....
(眾人大笑，心媽啤行佢)
心媽：諾諾呀，咁呢度邊個最靚呀?
(諾諾望咗各人一眼)
諾諾：............
(諾諾心諗，仲洗問，梗係我啦，但點好意思話自己啫!!)

諾諾金句 (三)

2007年8月5日

晚飯後從婆婆屋企走的時侯~~
心心：爸爸，你一陣抱我埋個閉路電視度，同公公婆婆講BYE BYE呀!
諾諾：咁邊個抱我呀?
我答：你搵姨丈囉。
(諾諾唔出聲)
心心：爸爸抱最高嘛!
唔知邊個問：咁邊個抱唔高呀?
諾諾：媽媽囉....又.....

諾諾金句 (二)

早幾日：
佢响心媽張床度玩，心媽想著襪，咪一屁股duck上床囉，點知不偏不倚sit到dd佢隻手仔，佢又以慣常無音調(有d似呂奇)的口肳話："媽媽，你好似坐住我隻手喎....."，媽媽即彈起："係咩?"，nok仔話："咁你要講對唔住先得架!"，媽媽即答："sorry sorry，咁你明知媽媽坐，就咪放隻手响度啦嘛!"，nok仔咀gel gel話："我點知你坐落嚟啫?你應該望吓嘛!"

2007年8月2日
nok仔同心媽煲粥(其實講廢話)時，
突然醒起問：媽媽，你係咪返緊工呀?你係咪响綠色站落車呀?(查實當時已5點幾，返咗工好耐啦!)
心媽：係呀!....咁收線啦喎，bye bye
nok仔：好呀，咁你記住叫姨姨、爸爸同姨丈打比我啦喎!
心媽敷衍：好啦，byebye!

响lee個時間，心媽唔敢收線，因為試過心媽先收線，唔夠兩分鐘又收到電話，nok仔語帶責備同質問話："媽媽，我都未收線，你做咩咁快收人線喎?"。於是乎，心媽家陣每次都要聽到"pop"一聲先敢收線。

哈，果然係，5秒後，
nok仔突然問：咁婆婆洗唔洗返工架?
心媽：唔洗呀!
nok：咁公公呢?
心媽：要呀!
nok：咁舅父呢?
心媽：都要架!(真係無佢咁好氣)
nok：咁你記住叫公公同舅父打比我啦喎! byebye
跟住pop一聲cut線

响佢心目中，每個要返工的人都要打比佢!!!
report???
諾諾老細!?!?!?

諾諾金句 (一)

2007年7月28日
等LIFT時，一有LIFT我閃咗入去無嗌佢，佢發現後一路急急腳行一路UM UM噚噚話(以為無人聽到)："唉吔，有LIFT，都唔叫人....." (想埋怨又自知理虧)

2007年7月28日
响地鐡月台有3個位，心媽坐中間，佢坐左邊，好心叫我一齊坐，我玩野話要坐佢個位，佢好順攤咁彈去右邊坐，我又玩鬼佢攝响佢同心媽中間(即2個位3個人好迫咁)，佢指住左邊個位得一個音調咁話："咦，果邊好似有個位喎...."我咪笑住坐番過去，佢細細聲講："唏，真係呀!"(意思比你激死)