五星級大鼠

Ratatouille(五星級大鼠)

畢貝特 Brad Bird

粵語配音：鄭中基、梁漢文、張柏芝

動畫

２００７年８月２日

為食大鼠味王(Remy)天生嘴刁為食，畢生志願是成為五星級大廚。味王膽粗粗去到美食之都巴黎，「鬼鬼鼠鼠」就係想入廚房煮兩味，結果遇上不懂煮食又論論盡盡的廚房打雜闊條麵(Linguini)，更準備合作大展拳腳，由味王使出真功夫，由闊條麵出面又「出手」。當然搞到全城一鑊粥，炒起無數笑料！

餐廳的廚房有老鼠出現，俾人知道仲駛做生意？餐廳更加等住查牌兼封舖！究竟一隻人見人怕的老鼠，怎樣在「生鼠勿近」的廚房闖出名堂？雞手鴨腳的闊條麵，又怎樣代鼠落廚？出名尖酸刻薄，食肆俾佢踩過等執笠的魔鬼食評家梵高森，亦已瞄準味王所在的餐廳…到底味王能否成為真正的五星級大廚，實現這個不可能的夢想?

====================================================

噚日去咗睇五星級大鼠，原本諗住淨係心心姐去，點知諾仔又想去，咪一齊囉。嘩，4個人坐2個位，真係有小小腳痺!!

成套戲其實幾悶，平鋪直敍，無咩劇情可言。至大問題係成2個鐘，對小朋友嚟講，簡直係耐性大考驗。諾仔好叻架啦，無怕黑，開頭45mins都好專心投入咁睇，奈何之後開始無耐性，但都頂到尾，唔該晒。我諗5歲以下的小朋友，都係啱卡通片多d，動畫佢地未必識睇!