22/12，冬至，夜晚同屋企人食飯。
23/12，夜晚出咗尖東"立"咗一陣燈飾。
24/12，X'mas eve，响Pooh House搞咗個mini party，與眾同樂。終於買咗我心儀已久的WII FIT，同心氏一家一齊扭夫拉圈、頂頭搥，爆笑。
枱上的壽司呀、菠蘿腸呀、菜呀、面呀、薯條呀、手撕鷄呀.....只不過係陪襯品......
呢個ICE-CREAM CAKE先係MAIN COURSE......
25/12，去咗行工展會，至大收獲係見完D工展小姐，深覺自己"美艷不可方物"囉....HAHAHAHA....
26/12，至忙的一天，我DAI B、BFC、心心&諾仔一行4條茂利去咗海浪公園(當然係心媽請)，目的只有一個，睇"樂樂、盈盈"......
諾仔當日心情不佳，成日扭抱，真弊! 佢好頂癮的，一抱起佢，就吱吱喳喳，一落地行，就頭耷耷不發一言，嬲咗成村人咁。當日行程，首先當然去熊貓館啦，我地呢D新屎坑的人，當然唔多理兩隻老野安安佳佳，只探樂樂盈盈啦!可惜，一去到，佢地兩隻都做咗爛瞓豬，郁都唔郁，等咗成20分鐘，無癮，打算走....唉....樂樂突然坐起身喎...捽捽眼仔就跳落地，仲DUM咗盈盈一腳添。佢不斷响度門前行來行去，想入去食野，但又開唔到門，真可憐又搞笑。佢呀，無聊起上嚟，不停搞盈盈，又踩又坐，要佢起身陪玩，無計呀，盈盈又唔多SHOW佢喎，FING一FING隻手又攤咗响度。突然間，度門打開咗，樂樂一枝箭標入去，原本懶洋洋攤响度的盈盈亦拿拿臨起身衝埋入去，好好笑。
原本以為佢地入去開餐，我地無得睇啦，點知原來係工作人員出嚟派竹葉，仲放响我地正前面添，等樂樂盈盈一陣對住我地食野嘛! 咁當然唔捨得走啦，又睇...嘩，佢地食野真係好好笑，自己有又唔食，硬要搶對方手中的，個食相又猴禽喎，大口大口咁嗒，好可愛，我第一次咁近距離睇熊貓的，好開心!只不過企咗45分鐘左咗之嘛!
(註：邊隻係樂樂，邊隻係盈盈，係心心講架，我完全分唔出架，我信佢架咋!)
跟住食野，玩兒童王國，跳彈床，坐纜車，睇海洋劇場，坐觀光塔，去海獅館，行水族館......嘩，真係好鬼攰.....最後天都黑齊，8:15PM正式撒退，盡興而返，WOW!
YUMMY YUMMY~~
我的名字叫諾諾....唔係樂樂....咪搞錯呀
纜車途中
沒有留言:
張貼留言