開學了 - 心心篇

9月1日，心心展開佢人生中新一頁--升小學。

一大清早，起身梳洗，精神爽利，準時7:30落到樓下等校車。校車到，同心媽say聲bye後，正式第一日自己返學了。

據心心憶述，所有小一生都掛上名牌，落車時即有風紀姐姐拖住佢的小手帶佢返課室。如是者，到差不多放學時(是日佢放早，11:00放學)，老師突然同佢講：XX心，你無訂飯盒喎，你聽日記住叫媽媽幫你預備午飯啦喎! 心心大胆地同老師講：唔係喎，媽媽幫我訂咗飯架喎! 老師卻說：但名單上無你個名喎......

校車到達樓下，心媽接放學。心心即時眼有淚光：
心心：媽媽，你有無幫我訂飯呀?
心媽：有呀，上次咪訂咗囉。
心心(眼淚在眼框中滾動)：但老師話我無訂飯，聽日要自己帶飯呢!
心媽：係呀...唔緊要啦...我問清楚老師先啦。
(實質心媽當時心諗有無搞錯呀，XYZ....實要打去學校討回公道)

好嘞，當晚返屋企拿拿臨搵返張收據，準備聽日同學校對質。殊不知，噚朝8點幾學校打來，不停say sorry，話供應商搞錯咗，心心今日會有飯食的。咁算啦，開學可能一時混亂啫，最唔好係嚇親小朋友，等小朋友以為自己做錯野啫，第一日返學有陰影架嘛。典知12點幾學校又打來，咩事呢? 原來又係say sorry，同埋再一次強調已"責怪"(真係用呢個term喎)咗供應商。哈哈....咁一時搞錯啫...搞返掂OK啦...

但噚晚心心同心媽講，d飯好難食，佢只哽了一半，早知食番心媽一早預備比佢的魚旦燒賣好過!