做facial原來一D都唔好玩架!

噚晚，我Dai B獻出我眾多第一次中的其中一個.....做facial!!

話說我在婚紗展join個租衫package時，個sales不斷游說我join埋個facial package，話係你join咗租衫先有優惠架咋，其他人唔係呢個價錢架! 佢話8次"燕窩"facial原價2380，而家極"特價"500喎。佢又話新娘梗要至靚架啦，你驚佢sell你其他嘢咩，你去做5/6次都抵番晒啦 (其實我諗諗吓，我大日子當日都化到行一行，D粉都遮晒原本的皮膚啦，"un"靚都無人睇到啦)....就响佢的一輪咀狂轟下，我屈服了，佢得逞了，我又比了500大元。

其實臨近要book做facial開始，我己開始後悔了，一來佐敦好鬼遠，二來自己內心深處真係唔多like比人搞塊面仔。但買咗唔去好嘥，人一世物一世，咪去試吓囉。我同BFC一上到去，己經好奇怪，成間鋪深木色做主色，係咁爾整兩個好暗的燈膽仔，個reception就瑩光青色，感覺好鬼異。登記完，個小姐叫BFC行吓先，話要成個半鐘，咁於是佢咪走先囉。

個Consultant跟手帶我入去，一坐低，就同我講一陣做咩，又話要"針清"(用針挑黑頭)，又話要按埋個膊頭同背脊，我一聽到即耍手擰頭話：唔洗啦，唔洗啦，你淨幫我做facial得啦.....跟手佢帶我入房....嘩﹗又係烏燈黑火，我都懷疑個美容師睇唔睇得清楚﹗等咗一陣，個美容師入嚟，戴晒口罩好神秘，就開始幫我洗面同按摩，一路其實我己經好唔慣，周身唔自在，仲猛"鏈"我個膊頭，搞到人鬼咁痛。

戲肉嚟啦.....佢突然用二塊棉花撻住我對眼，跟住搽一大pat好杰好杰的mask喺上面，連眼位都查埋，跟住叫我瞓一陣，唔好郁，佢就行咗出去.......嘩﹗驚心動魄的5分鐘開始啦﹗由於佢用連住枕頭的毛巾包好緊我的頭髮，加上又冚咗張被，又攝好多毛巾响我身上，最重要係佢封住我對眼，我完全睇唔到嘢......果一刻真係好驚好驚，好無助，好恐佈，心跳勁快，好想起身又起唔到，總之好徬徨地掙扎.....我大叫三聲"唔該"，又無人理我，咁無計呀，咪唯有不斷叫自己calm down，諗吓第二d嘢, 個心開始跳得無咁快啦，但仍然好唔想咁樣.....就响我嗌完約5分鐘後，有個人終於走入嚟話：頭先係咪你嗌呀？有咩幫到你？(我心諗，叫咗咁耐先入嚟，有事都死得啦)...我咪問佢：我呢個整幾耐架？....佢話：你呢個呀？20分鐘....我即話：我唔整啦，我好唔舒服，你幫我搣咗佢呀﹗佢於是成塊幫我撕起，話你唔想整對眼要同美容師講嘛...我咪話：美容師都無問我﹗呢個人於是叫番我的美容師入嚟，佢猛話：點解呀？唔驚架喎，不如我幫你整過唔封眼啦﹗我咪話：唔使啦，我唔整啦，你幫我洗面啦﹗....但幫我洗完面後的態度勁差，淨係話：得啦....咁就自己行咗去，又唔帶番我出去，要我自己搵路走﹗

一句講晒，完全得個"驚"字......我終於明白d人"困lift"點解會咁驚咁失控，同埋nok仔點解聽到某d聲音會咁不安，我簡直感同身受，原來有時人的恐懼係好個別的，其他人點樣都唔會明白﹗

呢一刻，我淨知要好好保護對眼，睇唔到野原來我會好驚好驚﹗