幾忙吓~~~

呢幾日都幾鬼忙................

星期四，約咗班姊妹食晚飯，派帖兼傾傾點玩新郎。A小姐居然話驚我做"無間道"通水喎.....佢真係唔使驚啦，要娶我Dai B，當然要有好多好多的誠意同耐力，我不單止唔會通水，仲幫埋手諗遊戲同買用品添呀.....哼....問BFC你怕未？我都驚要姊妹8點嚟到好早，但佢地一d都唔覺，仲好爽快話完全無問題....真係真係唔該晒呀﹗無以為報，唯有........請佢地請飯啫﹗haha
~~~~~~~~~~~~~~~~~~~~~~~~~~~~~~~~~~~~~~~~~~~~

星期五，等咗3個月的結婚相終於有得拎咯。

負責攞相的是羅浮宮"製作部"，真係不得不讚佢地的服務態度，even早一日打嚟confirm時間都好有禮貌，話都知你地要番工好趕，不過我地拎相時間收7點，唔緊要架，你地儘量趕嚟啦﹗到攞相時，招待勁殷勤，由攞袋相出嚟到逐張開比我地check，完全無摧過我地，仲叫我地慢慢睇清楚，唔使急，總之好鬼友善，好鬼周到起啦﹗臨走時仲多謝前多謝後，令我地好鬼賓至如歸、好似自己係大豪客的感覺﹗讚!!!

所以最後要我地fill in服務意見書時，服務員態度一欄我填"very good"....希望佢地可以快d升職加薪啦﹗嘻嘻..........
















~~~~~~~~~~~~~~~~~~~~~~~~~~~~~~~~~~~~~~~~~~~~~~~

星期六，節目如常，family day~~特別之處在於今日諾諾哥跳舞班開放日，可以比家長參觀睇堂。經商議下，決定由我Dai B同心媽做代表，對諾仔作出無限量的支持和鼓勵。

但諾仔跳舞真的好搞笑，永遠慢人一拍，人舉左手佢舉右手，人地扮美人魚將腳仔放在旁邊佢就伸直腳算數，人地扮機械人周圍走佢就原地踏兩步，真係"吞pop"....haha....開頭我地都驚入去睇住佢會唔鐘意，唔肯郁，唔肯跳，甚至扮樹熊唔肯出去，但事實又唔係喎，佢簡直旁若無人咁陶醉喺佢自己的舞蹈世界裡面，等你地呢班觀眾可盡情咁欣賞到佢非凡的舞藝....oh，佢真的大個女了，唔再怕醜，可以獨當一面了。
















至於夜晚，由於"心氏"家族夜間有應酬，我於是即時申請"休假"一天，盡情夜浦。我Dai B咁純真，所謂的浦，咪就係同BFC去咗又一城睇"戇豆放大假"咁大把囉。

之前睇影評都話幾正，所以都抱幾大的期望，跟住買飛時見到上畫咁耐都有8、9成full，更加有信心。果然不負我Dai B的厚望，好好笑，戇豆戇得嚟好討人喜歡，唔會覺得佢的趣事低能或自己攞嚟衰。呢套電影亦帶出一個message，就係傻人有傻福，戇豆旅行時沿途攞住部DV隨意拍下的短片，最後居然成為受歡迎的電影製作，話比大家知好多時計算出來的事情未必成功，反而"無心插柳柳成蔭"呢﹗