古惑生果檔

星期六，我地同心爸心媽食完lunch，順便去街市買生果。街市三檔生果，我一直都係幫襯其中一檔，貪佢d提子大粒小小。雖則我地不嬲都質疑唔夠秤，但相距不遠我地都算數。

果日，我地又如常買提子後，見d恐龍蛋幾新鮮，咪買囉。當時佢地的價錢牌好奇怪，棟咗2個，一個"每個六元"，另一個"每磅十二元"。我同BFC已研究咗好耐即係點賣，我地估"每個"係refer to有d人可能只買1/2個，唔夠一磅，咪逐個計囉。當時個伙記全部聽晒都唔應我地。

好嘞，我揀咗4個，叫佢計，佢磅都唔磅收我$24，即係逐個計。我當時邊諗邊不其然比咗錢佢，但心生不忿，咪問佢咁點解又話"每磅12元"呀? 條友找完錢後，笑笑口放袋野上磅，搞錯呀，1磅8咋喎，擺明搵我地老襯! 佢話係咁計架，完全唔理我地。行咗幾步，我地條氣極度唔順，BFC決定唔要袋生果問佢攞番錢。

仲奇怪，一返轉頭，"每磅十二元"唔見咗，淨返個"每個六元"棟响度，擺明玩野啦。我地話唔要啦，比番錢我地，另一個伙記二話不說將袋野pat上個磅度，笑笑口話：磅返比你啦....我地話而家唔要啦，唔係磅唔磅問題，係誠信問題....條友又話要問吓老闆娘，我地話你咪問囉，唔回水報警添呀....

最後，老闆娘都費事出嚟，回錢比我地....佢梗係唔出嚟啦，一日發生咁多單呢d事，佢出得嚟幾多次呀? 做生意做得咁古惑，咪即係無下次囉....我地已經唔識睇磅唔識講價，唔太離譜都算數，但佢地咁樣同打開我銀包搶有咩分別呀? 仲要笑笑口明當我地水魚，真係......頂......

呃我Dai B.....你會沒有好結果!